فى هذا المقال ننقل لكم تجربة احدى الاشخاص من على مواقع التواصل الاجتماعي، مبدئيا كده الصين ، الدنيا زحمه من ساعة ما تنزل م الطياره ، اللي هو حتى الطياره قعدت ساعه الاربع واقفه عشان تلاقي مكان تركن اصلا ! انت متخيل يا مان؟! ، الصينيين اتمين جداَ و مابيساعدوش حد ، مابيساعدكش غير الغريب اللي زيك (اوروبي، عربي، هندي،……،).

سواقين التاكسيات مابيشغلوش العداد و بيفاصلوا ف الاجره و بيشربوا سجاير و هم سايقين و معاهم زباين عادي جدا و قمة قلة الذوق و بيتأمروا و يقولك لأ انا مش رايح الحته الفلانيه ، انا لو ف كرداسه مش ف الصين مش هتعامل المعامله دي! ، الاوتوبيسات حلوه و رخيصه و فيها واي فاي.

القطر يشبه قطورات مصر لحد كبير ، بس اسرع طبعا و القائمين ع النظام فيه بيشتغلوا بذمه، موضوع الاكل عايز تحري شويه عشان ماتلبسش ف اكل غريب حتى لو انت ف كنتاكي او ماك.

الانترنت في الصين وتوافر الخدمات

الانترنت ف الصين متوفر ف كل حته تقريبا ، بس بطئ و بيقطع و احيانا سرعته بتوصل 2G ! بس تقريبا مافيش فندق مش موفر الواي فاي مجانا لزواره ، بمناسبة الفنادق ، الفندق حاططلي كل حاجه ممكن استخدمها مش بس شاور جل و شامبو لأ دول حاطينلي فرشاة سنان مغلفه و معاها انبوبة سنان صغيره و موس حلاقه و انبوبة معجون حلاقه ، صحيح جودتهم سيئه و ماستعملتهمش ، لكن التفكير كويس ع اي حال ، و حاطين شمسيه ف الدولاب عشان لو المطره مطرت ، اه و حاطينلي كاندوم و جل لزوم لو حبيت اعك!.

مشكلة W.C فى الصين

الشطافات فين؟ سؤال يراودك بمجرد دخولك اي بلد مش اسلاميه ، الناس دي عايشه ازاي من غير شطافات؟! انا فعلا بعد تجربة الشطافه الخارجيه ف السعوديه و ان مافيش شطافات ف الصين عايز ارجع مصر ابوس شطافة الحمامات بتاعتنا !.

الستات هنا كلها او اغلبها بشنبات ، الواحد لو دخل صفقة ملاقيط هنا هيكسب دهب  الستات الوحيده المهتمه بنفسها اللي قاعدين ف استقبال الفنادق و دول بيبقوا عاملين زي البنات اللي بيقطعوا تذاكر ف شبابيك سينما اوديون كده  نفس مستوى الميكاب الحقير.

اه الستات هنا بيسوقوا موتوسيكلات عادي ، و الموتوسيكلات هنا بتبقى عجله و ربنا نفخ ف صورتها و اترقت ، انت شايف عجله بجادون و بدال بس مركبينلها موتور و مشغلينها موتوسيكل.

الزوجات هناك او الستات شخصياتهم قويه و تقريبا هم اللي بيسوقوا البيوت ، و الراجل بس بتبقى مهمته انه يجيب فلوس ، الست هناك بتشتغل شغلانات متعبه زي انهم بيشتغلوا سواقين تاكسيات و عربيات نقل تقيل و اوتوبيسات احيانا ، انا مره شوفت واحده سايقه موتوسيكل و جوزها هو اللي راكب وراها ! اغلبية البنات بتروح تشتغل ف مدن تانيه من سن 22 سنه او اقل و بتأجر شقه مع مجموعة بنات (حاجه كده زي بيوت المغتربات عندنا ف مصر) و بيروحوا يزوروا بلادهم كل فتره (ممكن تعدي الشهر !) عشان يوفروا الانتقالات ! ، كذا مره اشوف راجل و مراته ف الاسواق ماشيين و شايلين شنط و بيبقى واضح انها شايله اكتر منه !.

الأكل في الصين مميزات وعيوب

اول يوم ليا هنا رحت كلت ف كنتاكي ، فراخ برضه! ورايا ورايا م السعوديه ، بس ده اللي كان موجود ادامي و فاهمه ، تاني يوم الجماعه اللي مستضيفني ودوني مطعم اسلامي و اكلت جمبري و رز ، صحيح الطعم مختلف (طبيعي يعني ، جمبري صيني و رز صيني) بس انا عارف انا باكل ايه ، النهارده المصنع كان عامل غداء عمل لزباينه و زباينه دول صينيين ، فراسهم و الف صرمه قديمه ناكل اكل صيني ، وافقت ع مضض و اديتهم قايمة المحظورات اللي مش هاكلها او اشربها ، رحنا المطعم و الصين فيهم عاده غريبه ف المطاعم اللي هو لما بتطلب.

الطلب بيجيلك ع مراحل و اللي مش مثلا الشوربه الاول و بعدين حادق و بعدين حلو ، لا لا لا ، دول يختلفوا عن الاخرين تماما ، اللي بيجهز طلعه و حطه ع ترابيزة الزبون و خلاص ، الخلاصه حطولنا حاجات كتير مافهمتهاش ، كل شويه اميل ع البنت الوحيده فيهم اللي بتتكلم انجليزي و اسألها ايه ده؟ و هي ترد عليا لو حاجه مش من قايمة المحظورات ، ولو قرف بتشوحلي اللي هو اسكت ولا تسألوا عن اشياء ان تبدى لكم تسؤوكم ، المهم انها حتى لما بترد بتقول ميكسات غريبه ماتركبش ع بعض ، و لما اقولهم شكرا مش عايز ، يقولولي طب نحط دي ع دي هتبقى حلوه ، اللي هو كنافه بالجمبري مثلا و محشي فاصوليا و انا مش عايز اكل فلما هيخلطوهم بقى حلو كده.

من ضمن عادات الصينيين برضه ان الاكل بيتحط داير ما يدور ع ترابيزه دواره ، و الترابيزه تقعد تلف و كل واحد ياخد اللي هو عايزه ف طبقه ، فالاقي بقى واحد بياكل معلقة حلو ع معلقة حادق ع معلقة شوربه ع معلقة جاز ع معلقة تينر ع معلقة بلا ازرق ، و كله بيتاكل ف نفس الطبق و بنفس المعلقه! و طريقتهم ف الاكل تقرف بياكلوا بكل جوارحهم و شعورهم و امكانياتهم ، انا كنت مستني واحد فيهم بس يقلع جزمته و ياكل برجله عشان تبقى كملت ، مهما كانت طريقة اكلك مقرفه او مقززه مش هتبقى زيهم ، يعني مش هتتحرج و انت بتاكل معاهم.

وسائل التواصل الاجتماعي في الصين

الصين مانعه اغلبية وسايل التواصل الاجتماعي و بتقفلها واحد ورا التاني ، يعني انا عشان اكتب الكلمتين دول لازم اشغل الVPN ، هم بس مشغلين برنامج الwe chat ماعرفش ليه مانعينه مع انهم طول الوقت ماسكين الموبايلات و بيكلموا الزباين بتوعهم اللي من كل العالم ف اوروبا و افريقيا و اسيا و الشرق الاوسط.

ثقافة البرفانات هنا معدومه تماما ، ريحة شوارعهم تقرف و هم ريحتهم زفت و اللبس اللي بيلبسوه هو هواه بيتلبس كل يوم مابيغيروش لفترات طويله ، طبعا ده بالنسبه لي صدمه حضاريه فشيخه ، اللي هو انا جاي م الخليج (اللي كلاب فيها ريحتها برفان) ، رايح لناس حاطين الكلاب نفسهم كبرفانات.

بمناسبة اني قولت ف بوست سابق ان الصين مش نضيفه ، انا مافيش مطعم دخلته و لقيت ف غرف الاكل باسكت مهملات واحد يوحد ربنا ، و اللي ف ايده كيس ولا منديل يرميه ع الارض! امال يعني هيحطها ع الترابيزه اللي بناكل عليها ده حتى تبقى قذاره  .

الصينيين بياكلوا السمك بشوكه ، و لو شوكه ضايقته بيتفها ع الترابيزه ، اه بيتفتفوا عضم الفراخ و شوك السمك ، امال هيوسخوا ايديهم مثلا!، المولات بتفتح 9 الصبح و بتقفل 9 بليل ، قولتلهم يا كفره ، ده السعوديه اللي اسمها السعوديه بتقعد لبعد كده ، يردوا يقولولي ما هو مافيش حد بيبقى ف الشوارع بعد تمانيه !.

المواصلات فى الصين

النهارده ف وقت البريك السواق و احنا رايحين مطعم نتغدى خدنا طريق shortcut  عشان الطريق الرئيسي كان زحمه ، اقسم بالله لو كنت نايم ف مصر و صحوني ف المكان ده كنت قولت اننا ف البراجيل او بشتيل ، و هدور ع طلعة الدائري .
المرور زباله ، مافيش رصيف اوسط ما بين الرايح و الجاي فتلاقي ناس كتير بتتعدى من هنا لهنا و ناس كتير من غير حزام امان و ناس سايقه و هم ماسكين موبايلاتهم عادي.

طبيعي انك تلاقي عربيات صيني و عربيات كوري (قرايبهم برضه) لكن عربيات الماني و خاصة الفولكس بالكميه دي حاجه مش طبيعيه و مختاج اسأل فيها اشمعنى الفولكس يعني؟!.

الاطفال فى الصين

الاطفال الصينيين بيبقوا عاملين زي اكياس القطن كده و قمامير و سو كيوت ، مش عارف ليه لما بيكبروا بيتبدلوا و كأنهم بيتضربوا نووي ف سن معينه.

بمناسبة الاطفال ، ف دردشة كده مع البنت المضيفه بتاعتي ، بتقولي ان اختها الكبيره متجوزه و معاها بنتين ، بس الجدود من العيلتين عايزينها تجيب الولد ، قولتلها نعم؟! قالتلى اه عندنا بيحبوا الاولاد الذكور عشان يشيلوا اسم العيله ، قولت ف بالي ده الصعايده ف مصر قربوا يشيلوا لافكره دي من دماغهم ، واخد بالك انت الكلام ده ف الصين!.

الاسامى الغريبة فى الصين

البنت اللي بنتعامل معاها ف البيع اسمها Elian و ده اللي اسم الي بتعبعت بيه ايميلاتها و بتمضي بيه عروض السعر اللي بتبعتهالنا، لما سألتها اسمها ايه بالكامل قالتلي اسم معقرب كده مافهوش ريحة Elian دي ، و لما سألتها ، قالتلى لا ما هو احنا لما بنتعين ف وظايف بيع مع شركات خارج الصين لازم نختار اسم انجليزي عشان نتعامل بيه بدل اسمائنا اللي بتبقى صعبه ع بعض الجنسيات!.

مشكله تشابة الاشخاص فى الصين

بمناسبة البنت ، البنت دي انا شوفت بتاع 7 منها ، و لما اقول 77 منها يعني مش شبهها ، لا ده تطابق ، في واحده فيهم شوفتها راكبه معايا الطياره و جايه الرياض ، حرفيا كنت هروح هقولها انتي ايه اللي جايلك ورايا ؟ انتي مش قولتي مروحه بعد ما وصلتيني؟! ، التطابق بيوصل ف الشكل و تسريحة الشعر و نوع اللبس م الكوتشي لتوكة الشعر و الاكسسوار.

بمناسبة الاكسسوار ، ماشوفتش ست او بنت ف الصيت لابسه دهب ، اما لابسه اكسسوار ، او مش لابسه حاجه خالص ، خالص بمعنى ان حتى ودانها مخرمه بس من غير حلق!.

السفر الي بكين

الحمد لله اتيحت ليا الفرصه اني افضى تقريبا نص يوم و اسافر بكين و منها اخد طيارتي و ارجع الرياض ، ماكدبش عليكم ، فكرتي اتغيرت سيكا عن القرف اللي انا كنت شايفه ف صانزو ، معالم الحضاره واضحه حبتين ف بكين ، مش واو اوي بس الدنيا ظريفه ، اه قابلت بتاع 1000 واحد و لقيت بتاع سبعه مثلا حاطين برفانات  لبس الستات مودرن و ع طراز اوروبي ، مافيش صناديق قمامه كفايه ، لكن الدنيا انضف ، الدنيا زحمه جداَ ، عايز اقولكو ، ان المترو اللي متصور فيه ده كده كان رايق ، انا حاولت اركبه تاني وقت خروج الموظفين ماقدرتش و خرجت بره خدت اوتوبيس ، حاولت ادخل ال forbidden city ، و لكن ماقدرتش عشان كان فيه صيانه باين ، ادام ال forbidden city ف شارع روعه و متفرع منه حواري ضيقه عامله زي القاهره القديمه و خان الخليلي عندنا كده فيها حاجات حلوه و رخيصه نسبيا بالنسبه للي انا شوفته بره بكين ، اه من العجب العجاب ان اسعار الاكل ف المدن مثلا اغلى من بكين ، و كذلك الاكسسوارات و الهدايا. !

سور الصين

الرواتب فى الصين

اللي بيشتغل ف بكين بيبقى مرتبه ضعف اللي شغال ف مدن تانيه (لو كانوا هم الاتنين نفس الخبره و التعليم و الكفاءه) ، و ده عشان الايجارات و الانتقالات اغلى.
متوسط المرتبات لل fresh اللي متخرج من جامعه بتوصل 5000 يوان (11500 جنيه مصري) و بتبقى الضعف للي شغال ف بكين (انا خدت المعلومه دي من مصدر واحد و ماعرفش مدى دقتها).

البقشيش فى الصين

ثقافة ال tips معدومه ف الصين عامة ، ماحدش بيخدمك ، و عينه ع ايدك او جيبك ، كل اللي بيخدمك بيبقى بس مقابل انك بتديله تمن الخدمه او انك ترجعله تاني مش اكتر ، مديري قالي حط كل يوم ع المخده و انت نازل م الفندق 1 دولار كـ tips لعمال النضافه (دي الطريقه العالميه المتعارف عليها ف موضوع ال tips لل house keepers) ، و لما عملت كده ، كنت برجع الاقي الدولار مطرحه ماحد ش بياخده ، و ده كان بيحصل كل يوم !!.

الزواج فى الصين

الصينيين محددين مهر عند الزواج بيكون حوالي 100 الف يوان (230,000 جنيه مصري تقريبا) ، و ده مالوش علاقه بانه بيتجهز بيه ولا حاجه ، دي حاجه كده بياخدوها الاهل مقابل التنازل عن بنتهم (ده اللي فهمته و الله اعلم) !.

اللغة الانجليزية فى الصين

الانجليزي ضايع ، لك ان تتخيل يا مؤمن ، ان مصنع طويل عريض ليه كذا فرع و كذا مكتب ، اللي بيتكلموا فيه انجليزي يتعدوا ع صوابع الايد الواحده ، لأ و مش fluent كمان ، البنت اللي كان ف استقبالي ف المطار مثلا ، اول ما قابلتها بقولها Hi ، how are you? ، i am sorry for late ، بتقولي لا براحه عليا شويه عشان مش فاهمه ! الاعجب ان حتى ف مطار بكين مش كلهم بيتكلموا انجليزي و اللي بيتكلموا هناك برضه بيتكلموا انجليزي مدغدغ !.

الصينيين صوتهم عالي و رغايين جداَ ، يشبهوا العرب ف الحته دي ، غير ان عندهم طبقات حروف لازم تقولها بشخطه كده ، فيظهروا ادامك انهم بيتخانقوا مش بيتكلموا.

حسن الضيافة فى الصين

البنت المضيفه كانت لما نتغدى تقوم هي جري تدفع الحساب ، و كنا بنتخانق عند الكاشير ف الموضوع ده ، و الاقيها بتقولي ان ده واجبي ، اقولها ليه؟ ، تقولي عشان انت زبون شركتي ، مافيش بقى هري المجاملات بتاع (انت ضيفنا) و (نشيلك ع دماغنا) و (نفرشلك الارض عرقسوس) ، كل ده لامؤاخذه ظرط عندهم.

خلاصة السفر الى الصين

الخلاصه: الصين مش زي اللي ف دماغك ، انا كان عندي مشكله و جايز تبقى عندك انت كمان ، اللي هي انك واخد الصين و اليابان و كوريا الجنوبيه و سنغافوره باكدج واحده ف التحضر و التكنولوجيا و التعليم و الاقتصاد ، و متخيل خطأ ان الناس دي ماشيه بروبوتات ف الشارع و بيطيروا بمكوك فضائي ، و ده طبعا غلط ، بيفكرني لما كنت اكلم حد من اوروبا او امريكا و يفتكرني بما اني عربي لازم ابقى بجلباب ابيض و عقال و شبشب ، كتير م الغرب واخد العرب باكدج واحده (الباكدج الخليجي) فلازم كنت اقعد معاه و افهمه اننا اه كلنا عرب ،بس مختلفين ، الخليج غير الشام و مصر غير المغرب العربي و هكذا ، الصين دوله تعبانه ، مش عايز اصدمك و اقولك ان مصر ممكن تكون احسن منها ف حتت معينه ، بس دي يطول شرحها و مش هتنفع ف بوست ع الفيس بوك ، الخلاصه الدول دي (الصين، اليابان، كوريا الجنوبيه، ،) غير بعضها ، الصين عندهم تشابه معانا ف حاجه تانيه برضه كمصريين ، انهم عندهم حضاره فشيخه ، و عايشين يتباهوا باللي عملوه الاجداد ، و باقية الدول اللي حواليهم عماله تتقدم و مظاهر الحضاره عندهم ف رقي ، و هم محلك سر (مقارنة بالدول اللي حواليها طبعا).

باقية الخلاصه: طب الصين قويه ازاي اقتصاديا؟ خليني احكيلكم ع حاجه حصلت و بعدها هشرح (اللي انا فهمته من وجهة نظري) و انا بعمل test ع الماكنه بتاعتي ، مدير بيع الشركه (و هو احد الشركاء كمان) لقى مسمارين ع الارض واقعين شالهم و حطهم ف صندوق العده بتاع العمال عشان يتم استخدامهم ، موقف تاني ، لما كنت بدخل مطعم اتغدى و اروح اغسل ايدي ، كنت بلاقي ازازة الصابون السايل اللي بتستخدمها مخلوطه بميه ، اه و الله زي ما بقولك كده ، مع ان الصابون هناك رخيص ، و مع انك مابتدفعش شويه ف الغدوه ولا العشوه يعني ، اللي بيحصل عندنا ف المصانع انك بتروح تجيب مسمار الماني (بالشئ الفلاني) طبعا عشان يعيش و يستحمل و لسوء الاستخدام او اي حاجه المسمار ده بيتقطم او بيتبري ، تروح فورا تجيب غيره الماني برضه ، و كل ده ع دماغ الcost  بتاعتك اللي بيتحملها زبونك بعد كده ، ف الصين بيستخدموا المسمار الصيني بتاعهم اللي سعره اقل 100 مره م الالماني ، و بيجداَوه حرفيا لحد ما المسمار يشتكي ، مابيغيرهوش لحد ما هو يقول جاااااااااي ارحموني ، و ده بيأدي لحاجتين ردائه تامه ف الكواليتي و رخص فشيخ ف الCOST و بعدين السعر للزبون بالتابعيه ، يعني انت بيبقى ادامك ماكينتبن بيطلعوا نفس المنتج واحده يابانيه ب 300 الف دولار و التانيه صيني ب 60 الف بس ، فرق السعر الفشيخ ده بيخليك (كمستثمر) تجري ع الصيني طبعا حتى لو هتعملك مشاكل ادام ، و ده سبب نهضتهم ، اكاد اجزم ان دي ال key القويه اللي ف الصين و معاها طبعا كتر الايدي العامله (مليار و شويه بني ادم يابا) و رخص تمنها.

– كل السلسله اللي فاتت هي بناءا ع تجربه اسبوع اقامه ف الصين – مدينة صانزو (مش مده كفايه عشان تدي حكم صح 100 ف الميه) ، و ده رأي شخصي بحت بناءا ع معطيات شوفتها بعيني و مناقشات تمت مع الصينيين نفسهم ، قابله انه تكون غلط او صح.

– انا تعبت هناك جدا ، و كنت مستني ارجع الرياض بفارغ الصبر ، بس لوجاتلي فرصه اني اكرر التجربه دي تاني ، بدون شك هكررها جدا ، بدافع حب الاستكشاف ع الاقل!.

تجربة الاستاذ : Mohamed Samir  من على جروب travelsecretsclub .

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *