أحداث الحلقة رقم 4 كاملة مترجمة من سكريبت المسلسل، بالاضافة لـصور الحلقة، عنوان الحلقة : “The Spoils of War” أو “غنائم الحرب” ، تشهدا الحلقة المعركة المنتظرة بين دينيريس تارجيريان وقوات اللانستر بعد هزيمة قوات دانى وحاصرهم في اخر معركة، تصل الاخبار الى دينيريس وتتوجه بالتنانين الى قوات اللانستر بقياده جيمى وتقوم بحرقهم جميعاَ مما يجعل سيرسي فى مأزق مع البنك الحديدي .

 كينجز لاندينج مع سيرسي وصفقة البنك الحديدى

– بتبدأ الحلقة بمشهد يجمع (سيرسى) مع (تايكو نيستوريس) مندوب البنك الحديدى، بتحاول تقنعه انه البنك الحديدى يقرض التاج مزيد من الأموال، باعتبارها حالياً هى أفضل أمل متاح لـ “ويستوريس” فى مقابل (دانى) بنت الملك المجنون اللى أثبت عدم كفائته فى حكم السبع ممالك و مش هتبقى فكرة كويسة أبدا لو تم دعم حد من نسله.

– (سيرسى) بتقترح عليه صفقة ما -“مش هنعرف ايه هى فى الحلقة دى”- ، و مندوب البنك الحديدى بيعلن موافقته على الصفقة و بيقولها انه بإمكانها الاعتماد عليهم بمجرد ما يوصل الدهب من “الهاى جاردن” و يستلمه منها.

– التسريبات فى الحلقة الأخيرة هنعرف منها انه الصفقة كانت قرض جديد من البنك الحديدى و (سيرسى) اشترت بيه جيش كامل عبارة عن 20 ألف جندى من المرتزقة !!!.

سيرسي لانستر

2 – “وينترفيل” :

– (أريا) بتوصل لأسوار المدينة.

– لورد (باليش – ليتل فنجر) بيهدى (بران) الخنجر الشهير المصنوع من صلب الفاليرى و اللى ظهر فى سيزون 1 و كان هيتم اغتيال (بران) بواسطة الخنجر ده.

– (ميرا) بتودع (بران) و هترجع للمكان اللى فيه أهلها، (بران) فى المشهد ده بيظهر بشكل و مشاعر غريبة زى ما يكون أصابه التوحد خلاص من كتر انعزاله و تركيزه بس ع الرؤى بتاعته.

– (أريا) بتدخل “وينترفيل”، لكن طبعا بما انها كبرت و شكلها و طريقتها اتغيروا تماماً فمحدش بيقدر يتعرف عليها، و الناس بيطالبوها بإثبات صحة إدعائها بإنها هى (أريا ستارك).

– (سانسا) بتظهر و هى اللى بتقدر تتعرف على (أريا) و بيجتمعوا الأختين مع بعض أخيرا، و بيفضلوا فى “وينترفيل” لغاية أخر السيزون.

– المشهد التالى (أريا) بنزور تمثال (نيد ستارك) و لسه معرفتش انه (بران) رجع هو كمان.

– غير مؤكد فى الحلقة دى (أريا) بتروح لـ (بران) عند الشجرة اللى بقى مقيم تحتها على طول، (بران) بيهدى (أريا) الخنجر الفاليرى اللى خده من (ليتل فينجر) و بيقولها انه عارف ليستة الأسماء بتاعتها اللى فيها الناس اللى هى عايزة تقتلهم.

– الأسبانى دكتور (فريكى) اللى بيسرب الحلقات، بيأكد إنه (أريا) هتستخدم الخنجر اللى معاها فى قتل الوايت واكرز فى الموسم الجاى .

– الإخوة (ستارك) بيتقابلوا مع (برايان) و (بود)، و فى المشهد ده بتحصل مبارزة بشكل ودى ما بين (برايان) و (أريا) … فى البداية (برايان) بتتعامل بالراحة و باستخفاف مع (أريا) باعتبارها صغيرة و ملهاش فى المبارزة و القتال، لكن فى ثوانى بتتفاجىء بشدة بالمستوى المذهل لـ (أريا) فى القتال و انها تقدر حتى تهزمها و تقتلها … (سانسا) بتنبهر و بقها يدلدل و هى بتتفرج على القدرات الكبيرة اللى بقت عند (أريا)، و فى الخلفية من بعيد واقف (ليتل فينجر) بيتفرج عليهم و كله غيظ من قدرات (أريا) الجديدة و رجوعها عشان تبقى فى ضهر (سانسا) و بيحس بقلق كبير من نواياها و اللى عايزة تعمله فى الشمال.

– (برايان) بتبص للأختين و بتحس بفخر كبير بيهم، و انها نوعاً ما خلاص نجحت فى الوفاء بقسمها لـ (كاتلين ستارك).

– أخيراً (أريا) – المخلصة تماما لـ (جون) – بتبدأ تشك فى نوايا (سانسا) بإنها عايزة حكم الشمال لنفسها، و ده اللى بيستغله (ليتل فينجر) و بيقعد لآخر السيزون بيحاول يوقع ما بين الأختين.


دراجون ستون مع دانيريس وميساندى

– البداية مع دردشة نسائية ما بين (دانى) اللى بتقول لـ (ميساندى) متقلقش على (جراى وورم) و انه هيرجعلها من “كاستلى روك” -طبعا لسه معرفتش اللى حصل- ، و بتسألها هل حصل حاجة ما بينهم ؟؟ فـ (ميساندى) بتجاوب و تقولها حاجات كتير … (دانى) بتفهم من كلامها انه حصل ما بينهم علاقة جنسية، فبتستغرب و تسألها هل (جراى وورم) كان قادر على اتمام الاتصال الجنسى ما بينهم ؟؟ و (ميساندى) بتجاوبها بـ نعم.

– بعدها (جون) بيروح مع (دانى) جولة سريعة فى الكهوف اللى بيستخرج منها “زجاج التنين”، (جون) هدفه انه يوريها بعض الرسومات الموجودة على جدران الكهوف دى، الرسومات دى تم نحتها بواسطة “أطفال الغابة” فى زمن قديم جدا قبل ما يبقى فيه حاجة اسمها ستارك أو لانستر أو تارجاريان، (دانى) بتقول انه الرسومات دى شكلها موجودة حتى من قبل ما يبقى فيه حاجة اسمها بشر.

– (جون) بيشاورلها على رسمة بعينها زى اللوحة على الجدار، بيظهر فيها 5 من “أطفال الغابة” مع 3 من البشر و فى الخلفية واقف (ملك الليل)، بيقوم (جون) باستغلال الرسمة دى عشان يوضحلها انه الناس فى “ويستوريس” منذ القدم رغم اختلافهم إلا إنهم كانوا دايما بيتحدوا عشان يواجهوا (ملك الليل) فى كل مرة الخطر بتاعه بيقرب منهم و من حياتهم .

– (دانى) بعد ما بتشوف الرسومات دى بعينها بتبدأ تقتنع و تصدق كلام (جون) عن الخطر اللى بيواجهوه، و بتقوله انها مستعدة تساعده فى مواجهة (ملك الليل) لكن بشرط واحد بس ………………….. انه يركع على رجليه !!!!

– فى الوقت ده بتوصل أنباء اللى حصل فى “كاستلى روك”، و بيحاول (تيريون) و لورد (فاريس) يستجمعوا شجاعتهم عشان يبلغوا الأخبار المفجعة دى لـ (دانى) بإنه بقايا أسطولها اتدمرت و قوات الـ “أنسوليدز” أصبحت محاصرة داخل “كاستلى روك” فى انتظار عودة جيش الـ “لانسترز” عشان يقضى عليهم.

– طبعا (دانى) بتقرر و هى فى قمة غضبها انها تتدخل فورا و تاخد الـ 3 تنانين بتوعها مع قوات الـ “دوثراكى” و تلحق تهاجم قوات الـ “لانسترز” قبل رجوعهم و اتمام انتصارهم .

– على شواطىء “دراجون ستون” بيحاول كل اللى حوالين (دانى) يقنعوها انها متعملش كده و متخاطرش بنفسها لأنها أخر أمل ليهم و بدونها مفيش أى حاجة هيبقى ليها لازمة، طبعا (دانى) بمنتهى العناد و الحزم بترفض تماما انها تسمعهم و بتقولهم انها خلاص بتخسر و كل حلفائها بيموتوا !!

– (تيريون) و (فاريس) بيبدأوا يقلقوا من عدم قدرة (دانى) على التحكم فى انفعلاتها و ضبط قراراتها، (تيريون) فى محاولة أخيرة بيحاول يقنع (دانى) تستنى يفكروا فى خطة ذكية تنقذهم، لكنها بترفض برضو و بتقولهم انها جابت اخرها من موضوع الخطط الذكية ده، و بتركب تنانينها و بتتحرك مع قوات الـ “دوثراكى”.

– آخر المشاهد فى “دراجون ستون” بتبقى وصول (ثيون) للشاطىء أخيراً بعد ما تم انقاذه بواسطة رجال “جزر الحديد” اللى هروه سخرية و توبيخ طول الرحلة، (ثيون) كان متوقع انه يتم استقباله فى “دراجون ستون” بشفقة و تفهم للى حصل لكنه بيتفاجىء بـ (جون سنو) اللى بيمسك فى زمارة رقبته و بيقوله انه لولا مساعدته لـ (سانسا) قبل كده انها تهرب من (رمزى بولتون) كان زمانه قتله دلوقتى و مرحمهوش لحظة.

دينيريس تارجيريان

 المعركة المنتظرة بين دانيريس وقوات اللانستر

– المعركة المنتظرة بين (دانى) و قواتها و تنانينها ضد قوت الـ “لانسترز”، المفروض انها وفقاً للتسريبات هتاخد تقريبا نص وقت الحلقة و هتبقى من أقوى المعارك فى تاريخ المسلسل.

– هتبدأ المعركة بـ (جيمى) و (برون) واقفين بيتابعوا قواتهم فى طريق عودتها بقيادة (رانديل تارلى) و ابنه (ديكون) و معاهم قافلة الغنايم و الدهب من اانتصارهم الأخير، (برون) بيقترح بهزار انهم المفروض ياخدوا الغنايم لنفسهم و يقتسموها مع الجنود و بيسرح بخياله عن المستقبل اللى فى انتظارهم و هم معاهم كل الدهب ده، بينما (جيمى) جنبه عارف انهم مش هياخدوا منها حاجة و انها كلها هتروح للبنك الحديدى.

– فى اللحظة دى بتتحول الدنيا لجحيم حقيقى، صوت الصرخات المرعبة لجنود الـ “دوثراكى” لحظة هجومهم على جنود و قافلة الـ “لانسترز” و من فوقيهم الرعب و الفزع و النار بتطاير فى كل مكان من التنانين اللى بتقودها (دانى) ببراعة، اكتساح مرعب بيحصل فى اللحظات الأولى للقتال وسط سيطرة تامة من (دانى) وقواتها.

– بيقوم جنود الـ “لانسترز” بمحاولات بائسة لإصابة التنانين بواسطة الرماح و الأسهم اللى فى ايديهم، لكن طبعا بيفشلوا فشل تام و بيزداد القتل و النحر فيهم برا و جوا.

– فى اللحظات دى بيتوجه (برون) ناحية سلاح سرى متغطى و بيمشى على عجل، و اللى هو السلاح اللى ابتكره (كايبورن) للقضاء على التنانين و أعطاه لـ (سيرسى) و اللى بدورها خلت الجيش يتحرك بيه .

– بيبدأ (برون) محاولة اطلاق السلاح على التنانين و إصابتها لكنه بيفشل فى البداية ، و مع استمرار محاولته بينجح فى اصابة التنين (دروجون) اللى بتستقله (دانى)، الاصابة مش مميتة لكنها بتجبر (دروجون) على الهبوط أرضاً.

– فى اللحظة دى بيحصل أهم مشهد فى الحلقة، من وسط النار و الضرب اللى بيحصل و (جيمى) بيحارب قوات الـ “دوثراكى”، بيلمح بعينه (دروجون) و هو بيحط على الأرض و (دانى) فوقه … فوراً بيقرر انه يستغل فرصة انشغال (دروجون) فى لعق جراحه و بيحاول سريعا يهجم على (دانى) فى محاولة لقتلها و انهاء وتيرة الحرب دى كلها … لكن فى اللحظة الأخيرة (دروجون) بينتبه و بيلتفت ناحية (جيمى) استعداداً لإطلاق لهيبه … لكن بتنشق الأرض عن (برون) و اللى بيدفع (جيمى) من على حصانه و بيسقط معاه فى بحيرة مجاورة ليهم و يغطسوا فيها، فى نفس اللحظة اللى بيطلق فيها (دروجون) اللهب بتاعه لكنه بيعبر فوقيهم على سطح المية.

– بتنتهى المعركة بانتصار ساحق لـ (دانى) وقواتها و قضاؤهم على قوات الـ “لانسترز” و الـ “تارلى” ، و كمان بياخدوا غنايم كبيرة من المعركة دى ، و الأهم بيأمنوا ضهر قوات الـ “أنسوليدز” فى كاستلى روك و اللى كانوا هيواجهوا موقف عصيب جدا لو قوات الـ “لانسترز” أتموا رجوعهم و محاصرتهم ليهم.


مشاهد غير مؤكده

مشهد غير مؤكد: تيريون لانستر) بيكون موجود فى المشهد الأخير لكنه واقف بعيد و بيشوف محاولة (جيمى) انه يهاجم (دروجون) و يقتل (دانى) لغاية لما بينقذه (برون) فى آخر لحظة.

-مشهد غير مؤكد حدوثه فى آخر الحلقة دى أو هيحصل فى الحلقة 5 ، (دانى) بتجمع الناجين من قوات الـ “لانسترز” و اللى من بينهم (رانديل تارلى) و ابنه (ديكون).

بتعرض عليهم (دانى) انها تسيبهم على قيد الحياة لو انحنوا على ركبهم و أعلنوا الولاء ليها باعتبارها ملكتهم، (رانديل تارلى) بيرفض فورا باعتباره راجل بيحفظ كلمته و انها سابقاً تعهد بولاؤه لـ (سيرسى) .

فى اللحظة دى بيحاول (تيريون) انه يهدىء من غضب (دانى) لكنها فورا بتخلى التنانين بتوعها يحرقوا كل الناجين دول بالنار أحياء.

الأمر اللى بيثير فزع (تيريون) و بيشوف فى (دانى) لمحة من جنون القوة بتاع والدها، و انها فى النهاية معندنهاش مانع تستخدم الخوف و الرعب عشان تحكم.

تنين دينيريس تارجيريان

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *