معظمنا أول مابدأنا الهواية كنا بندور على إيه السهل فى تربيته و يقدر يعيش مع مية الحنفية فبدأنا بأنواع تقدر تستحمل فى أى ظروف زى الكوى و الجولد فيش و خلافه.
و مع الوقت الواحد بدأ يشوف أنواع سمك تانية جميلة و غريبة و كل مايسأل عنها يتقال له:
– ” لا يا عم دى عايزة ميه معينة …!!!”
– مية معينة ازاى ….!!!! ما كله ميه

و بدأ الواحد يسمع عن حاجات غريبة PH و TDS و مش عارف إيه و الحروف بدأت تكتر علينا و الواحد بدأ يتلخبط.
فاحنا هانتكلم شوية فى موضوع الميه المعينة ده و نمسك عناصرها واحد واحد ونعرف دا عبارة عن إيه .
يمكن الموضوع يكون دمه تقيل شوية و طويل جداً و مافيهوش صور و فيه مصطلحات غريبة ماعرفتش اسمها إيه بالعربى فاضطريت انى اترجمها حرفياً من جوجل … بس و الله موضوع مهم جداً …. هاقول لكم ليه….!!!

المياه فى الطبيعة عمرها مابتبقى مياه صافية بنسبة ١٠٠ ٪‏ …… بيبقى دايب فيها أملاح و معادن و عناصر غذائية و حاجات تانية كتير و دا بيختلف حسب البيئة المحيطة بالمياه ….. و كل الكائنات سواء كانت زرع أو سمك أو كائنات تانية أخدت ملايين السنين عشان تتكيف مع البيئة دى … لو أنا غيرت البيئة دى ممكن السمكة دى ماتستحملش … و حتى لو استحملت عمرها ما هتكون فى أحسن حالاتها.
كل دا غير بقى و قت الكارثة لا قدر الله تشوف السمك بتاعك تعبان و بيموت قدام عينك و انت مش قادر تعمل له حاجة
و آخر ماتغلب تحط صورة الجثة على النت و تسأل إيه السبب ….؟؟؟!!!
و خد عندك ٩٠٪‏ إجابات غلط و ١٠٪‏ إجابات صح و ممكن تكون بالصدفة كمان و خصوصاً لو مش باين حاجة على شكل السمكة أو تصرفاتها قبل ماتموت لأن المشكلة هاتبقى فى المياه و المياه فى حوضك انت …
فلازم تعرف إيه اللى بيحصل فى مياه الحوض عندك..

فيه أربع مقاييس أساسية هى اللى بتتحكم فى خصائص المياه و هى :
درجة الحموضة PH ، السعة التخزينية أو القلوية KH ، عسرة المياه أو الصلابة GH ، و المواد الصلبة الذائبة TDS
دا بالإضافة لبعض مقاييس فرعية زى المواد الغذائية و مجموعة العناصر المضادة للأكسدة أو زى مابيتقال عليها العناصر الصغرى… تعالوا نتكلم فيهم واحدة واحدة عشان الموضوع يبقى أوضح :

درجة الحموضة PH

البى اتش هى درجة قياس حموضة المياه ….. درجة تعادل المياه هى ٧ …. لما يبقى PH = 7 بتكون المياه متعادلة …. لو أقل من ٧ تعتبر المية حمضية ….. و لو أكتر من ٧ بتعتبر قلوية.

عند درجة بى اتش 5.5 بتكون حموضة المياه عشر أضعاف من حموضة المياه عند درجة 6.5 و دا معناه ان أى تغير و لو بسيط بيأثر فى المية بشكل كبير.
يعنى تغيير البى اتش بشكل مفاجئ و كبير ممكن يسبب ضغط على السمك و يوصل للصدمة حتى لو هاتغير من الأسوأ للأفضل … أكتر من 0.3 PH فى اليوم بيعتبر ضغط على السمكة …. فأحسن حل فى حالة تغيير البى اتش هو الاعتماد على الطرق اللى فاعليتها بطيئة نسبياً.
لو درجة البى اتش عندك مابين 6.5 و 7.5 أنت كدة ضمنت انك تقدر تربى نسبة كبيرة من السمك الموجود فى الهواية
فيه سمك ممكن يتأقلم معاك حتى لو خارج بيئته و فيه أنواع حساسة مش هايستحملوا .
– تقدر تقلل درجة البى اتش ( تزود حموضة المياه )عن طريق الخشب الغاطس ، الأوراق المجففة زى ورق اللوز الهندى و ورق الجوافة و ورق التوت .
– من أضمن الحاجات اللى بتقلل البى اتش هى ضخ ثانى أكسيد كربون فى المياه.
– فى منتجات جاهزة PH- بتتباع بس بتزود الطحالب بطريقة يصعب ساعات السيطرة عليها.
– لو عايز تعلى البى اتش ( تقلل الحموضة ) ممكن تحط ميديا فى الفلتر زى أصداف القواقع ، الشعب المرجانية أو كسر الرخام .

السعة التخزينية أو القلوية KH

الكى اتش KH مسئولة عن تركيز الكربونات أو البيكربونات فى المياه و تعريفها هو قدرة المياه على تخزين مواد تحافظ على درجة الحموضة فى المياه ….. عارفين تجربة الخل مع كسر الرخام ؟؟؟؟ الرخام بيمتص الأحماض و يتفاعل معاها فبيقلل نسبة ان الحموضة تزيد (يعنى بيزود البى اتش يبقى كدة ال KH و ال PH مربوطين ببعض ) عشان كدة الناس بتقول لك ماتستعملش جرش كسر الرخام لأنه بيتفاعل مع المياه و بيرفع البى اتش.
المياه الصافية تماماً زى اللى بتطلع من الفلتر ال RO بتبقى تقريباً فيها زيرو KH فبتبقى أكتر عرضة لهبوط ال PH
و زيادة الحموضة فى حالة ان كمية أحماض بسيطة تتضاف للحوض لأن انت كدة تبقى شيلت المادة اللى بتمتص الأحماض …. عشان كدة لو هاتستعمل ميه RO لازم تخلى عينك على ال PH و تقيسه كل اسبوع على الأقل ….. و يفضل لو هاتحط مياه RO تزود عليهم شوية ميه حنفية عشان تضيف للمياه جزء بسيط من الاملاح و المعادن …. أو تضيف انت المعادن اللى هاتحتاجها بس كل دا لازم يبقى بحساب.

عسر المياه أو الصلابة GH

الGH اختصار لGeneral Hardness ترجمتها الحرفية الصلابة العامة للمياه و هى عبارة عن نسبة تركيز الماغنيسيوم و الكالسيوم فى المياه ….. دايماً تسمعها لما تيجى تقرا عن سمك زى السيكلد لما يقول لك انه محتاج يعيش فى Hard Water يبقى كدا محتاج GH عالى .
لما أجى أقول لك حط قشر بيض فى الحوض عشان تزود الكالسيوم فى الحوض بس خلى بالك انه بيرفع ال PH
قشر البيض بيحتوى على مادة كربونات الكالسيوم ….. كربونات الكالسيوم دى عبارة عن كربونات (بترفع الKH)
و كالسيوم (بيرفع الGH ) و بالتالى بترفع الPH فى المياه …..
يبقى كدا ( PH,KH,GH) التلاتة مربوطين ببعض يعنى صعب انك تغير حاجة منهم من غير ما تغير الباقى ….

المواد الصلبة الذائبة TDS

الTDS اختصار لTotal Dissolved solids و ترجمتها الحرفية هى إجمالى المواد الصلبة المذابة
طبعاً بعد كمية التفاعلات اللى اتكلمنا فيها هايبقى فى مواد صلبة كتير بتدوب فى المياه و المواد الصلبة دى عبارة عن أملاح و معادن و مواد تانية و وحدة القياس ليها هى ال TDS

التعليقات

  1. السلام عليكم كيف تقيس هذه العناصر بالماي هل هناك جهاز معين أو طريقه ما ارجوا اخبارنا وشكرا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *